شنبه دوازدهم اردیبهشت 1388
سون تاپشیریق
سو دئییبدیر منه اولده آنام آب کی یوخ
یوخو اویرتدی اوشاقلیقدا منه خواب کی یوخ
ایلک دفعه کی چورک وردی منه نان دئمه دی
ازلیندن منه دوزدانه نمکدان دئمه دی
آنام اختر دئمه ییبدیر منه اولدوز دئییب او
سو دوناندا ،دئمه ییب یخدی بالا بوز دئییب او
قار دئییب برف دئمه ییب ،دست دئمه ییب ال دئییب او
منه هئچواقت بیا سویله مه ییب گل دئییب او
یاخشی خاطیرلاییرام یاز گونو آخشام چاغی لار
باغچانین گون باتانینداکی ،ایلیق گون یاییلار
گل دئیردی ... داراییم باشیوی ای نازلی بالام
گلمه سن گر باجووون آستاجا زولفون دارارام
او دئمزدی کی ؛بیا شانه زنم بر سر تو
گر نیایی بزنم شانه سر خواهر تو
بلی داش یاغسادا گویدن سن اوسان من ده بویام !
وار سنین باشقا آنان ، واردی منیم باشقا آنام
اوزومه مخصوص اولان باشقا ائلیم واردی منیم
ائلیمه مخصوص اولان باشقا دیلیم واردی منیم
ایسته سن قارداش اولاق بیر یاشایاق ، بیرلیک ائدک
وئریبن قول-قولا بوندان سورا بیر یولدا گئدک
اولا ، اوزگه کولک لرله گرک اسمه یه سن
ثانیا ، وارلیغیما خالقیما خور باخمایاسان
یوخسا گر زور دئیه سن میللتیمی خوار ائده سن
گون گلر صفحه چونر مجبور اولار سان گئده سن!
مرحوم پرفئسور زهتابی
............................................................
پرفئسور محمد تقی زهتابی (شبسترلی کیریشچی) 21 آذر – 1325 –جی ایلده
23 یاشیندا بو شعری یازیب. اوستاد زهتابی 21 آذر 1302 اینجی ایلی آنادان اولوب ، 1377 – ایل دونیایا گوز یومدو.
.....................................................................................
قایناق:تانری داریخیر؛ گونئی آذربایجان موقاویمت شعر آنتولوژیسی
حاضیرلایانی، سعید موغانلی.
شنبه هفدهم اسفند 1387
گون چیخدی اولدوزلاری دوشوردو
گون چیخدی چیچکلری گولدوردو
گون چیخدی ماراللاری هورکوتدو
بیردن بیره گوردوم
دونیا دوشوب گونشین الینه
گوزلدره
..............................................
..............................................
..............................................
شنبه هفدهم اسفند 1387
مه گلمیشدی
گوللرین سوئو داشیردی
مه گلمیشدی
باغلار پیچیلداشیردی
مه گلمیشدی
سونبوللر قایناشیردی
بیردن بیره گوردوم
اریک لر سارالیب
گوزلدره
...............................
...............................
...............................
شنبه هفدهم اسفند 1387
بولاغ گلدی گئجه نین تئلین تارادی
بولاغ گلدی نوروزگولون سانادی
بولاغ گلدی باغچالاری آرادی
بیردن بیره گوردوم
سو قیزیل گولو آپاریر
گوزلدره
..........................................
..........................................
..........................................
شنبه هفدهم اسفند 1387
بیلمدیم نجور اولدو آزا آلازلاندی
بیلمدیم نجور اولدو اوجاق آلوولاندی
بیلمدیم نجور اولدو کوتوک اودلاندی
بیردن بیره گوردوم
چاینیک داشیر
گوزلدره
...............................................
...............................................
...............................................
شنبه هفدهم اسفند 1387
بیلمدیم نجور اولدو آرپانین باشی سارالدی
بیلمدیم نجور اولدو آلمانین اوزو قیزاردی
بیلمدیم نجور اولدو گیلاسین قاشی قارالدی
بیرن بیره گوردوم
سارماشیق منه ساریشیب
گوزلدره
......................................................
......................................................
......................................................
شنبه هفدهم اسفند 1387
هئچ بیلمدیم ناواخ بوغدا اکیلدی
هئچ بیلمدیم ناواخ یونجا بیچیلدی
هئچ بیلمدیم ناواخ خرمن سورولدو
بیردن بیره گوردوم تلیس لرین آغزی تیکیلدی
گوزلدره
..........................................................
..........................................................
..........................................................
شنبه پنجم بهمن 1387
آقشام چاغی ایدی
یاغیش یاغدی قانیما
آقشام چاغی ایدی
اولدوز آخدی جانیما
آقشام چاغی ایدی
ایلدیریم دوشدو باشیما
بیردن بیره گوردوم
اود توکولدو داماریما
گوزلدره
شنبه پنجم بهمن 1387
آقشام چاغی ایدی
کوچوک واققیلدادی
آقشام چاغی ایدی
چاققال چاققیلدادی
آقشام چاغی ایدی
خوروز قوققولدادی
بیردن بیره گوردوم
سنین اوره گین تاپپیلدادی
گوزلدره
شنبه پنجم بهمن 1387
آقشام چاغی ایدی
بولود جیرانی سالدیردی
آقشام چاغی ایدی
چای شافاقی چاغیردی
آقشام چاغی ایدی
سو ورگانی آپاردی
بیردن بیره گوردوم
شعر منی باغیردی
گوزلدره
